Showing posts with label Trans-creations. Show all posts
Showing posts with label Trans-creations. Show all posts

Monday, 27 August 2018

ಬುದ್ಧನಾಗುವದು ಸುಲಭ....

ಒಂದುದಿನ ರಾತ್ರಿ
ಸದ್ದಿಲ್ಲದೇ ಮನೆ,ಮಠ,
ಹೆಂಡತಿ,ಮಗುವನ್ನು ಬಿಟ್ಟು ಸತ್ಯಾನ್ವೇಷಣೆಗೆ
ಹೊರಡುವದು
ತುಂಬ ಸುಲಭ...

ಯಾಕೆಂದರೆ
ಪುರುಷನಿಗೆ
ಯಾರೂ ಬೆರಳು ತೋರಿಸುವದಿಲ್ಲ...
ಹೆಚ್ಚು ಪ್ರಶ್ನಿಸುವದಿಲ್ಲ...
ಯಾರೂ ದೂಷಿಸುವದಿಲ್ಲ..
ಶಬ್ದಗಳ ಕೂರಂಬುಗಳಿಂದ
ತನು_ ಮನಗಳನ್ನು
ಗಾಯಗೊಳಿಸುವದಿಲ್ಲ..

ಆದರೆ
ಅವನಂತೆ
ಹೆಣ್ಣೊಂದು
ಸದ್ದಿಲ್ಲದೇ
ಒಂದು ರಾತ್ರಿ
ಎಂದಾದರೂ
ಗಂಡ,ಚಿಕ್ಕ ಮಗು,
ಬಿಟ್ಟು ಸದ್ದಿಲ್ಲದೇ
ಸತ್ಯವನ್ನರಸಿ
ಹೋಗಿದ್ದರೆ.....
ಅವಳ ಮಾತಿನಲ್ಲಿ
ಯಾರಾದರೂ
ವಿಶ್ವಾಸವಿಡುತ್ತಿದ್ದರೆ?..
ಅವಳ ಯಾತನೆಯ
ಅಂದಾಜು ಯಾರಿಗಾದರೂ
ಸಿಗುತ್ತಿತ್ತೇ?...
ಅವಳ ಸ್ತ್ರೀತ್ವದ
ಮರ್ಯಾದೆ
ಉಳಿಸುತ್ತಿದ್ದರೇ???.
ಇಡೀ  ಸಮಾಜಕ್ಕೆ
ಸಮಾಜವೇ
ಅವಳ ವಿರುದ್ಧ
ನಿಲ್ಲುತ್ತಿರಲಿಲ್ಲವೇ??

ಬಹುಶಃ
ಅವಳು ಕಂಡ
ಸತ್ಯದ ಅರಿವು
ಇದೇ ಆಗಿರುತ್ತಿತ್ತೇನೋ!!!!!

"ಬುದ್ಧನಾಗುವದು
ಬಹು ಸುಲಭ..
ಆದರೆ ಹೆಣ್ಣಾಗಿ
ಹುಟ್ಟುವದೊಂದು
ಬಹು
ದೊಡ್ಡ
ಸವಾಲು..."

(ಹಿಂದಿ ಮೂಲ)

Tuesday, 21 August 2018

ಏಳು! ಎದ್ದೇಳು!! ದ್ರೌಪದಿ....!!!

ನಿನ್ನ ವಸ್ತ್ರಗಳನ್ನು
ನೀನೇ ಸಂಭಾಳಿಸಿಕೋ..
ಇನ್ನಾವ ಕೃಷ್ಣನೂ ಈಗ ಬರುವದಿಲ್ಲ....

ಎಲ್ಲಿಯವರೆಗೆ
ಆಸೆಯಿಟ್ಟುಕೊಂಡು ಕಾಯುತ್ತಿ..
ಸ್ವಂತ ನಿಯತ್ತನ್ನೇ ಮಾರಿಕೊಂಡವರಿಗಾಗಿ....??

ದುಶ್ಶಾಸನರದೇ
ದರ್ಬಾರದಲ್ಲಿ
ಯಾರಿಂದ ರಕ್ಷಣೆ ಬೇಡುವಿ??

ಸ್ವಂತ ಲಜ್ಜಾಹೀನರು
ನಿನ್ನ ಮರ್ಯಾದೆ _
ಯನ್ನೇನು ಕಾಯಬಲ್ಲರು???

ಏಳು! ಎದ್ದೇಳು!! ದ್ರೌಪದಿ..
ನಿನ್ನ ವಸ್ತ್ರ ನೀನೇ ಉಳಿಸಿಕೋ....

ಹಿಂದಿನವ ಕೇವಲ
ಕುರುಡು ರಾಜನಾಗಿದ್ದ...
ಇಂದಿನವರು ಮೂಕ,ಹಾಗೂ
ಕಿವುಡರೂ ಆಗಿದ್ದಾರೆ....

ಪ್ರಜೆಗಳ ತುಟಿಗಳನ್ನು
ಹೊಲಿಯಲಾಗಿದೆ...
ಹೇಳು- ಕೇಳುವದರ ಮೇಲೆ ಪಹರೆಯಿದೆ...

ನೀನೇ ಯೋಚಿಸು...
ನಿನ್ನ ಅಸಹಾಯಕ ಕಣ್ಣೀರು
ಯಾರ ಮನ ಕರಗಿಸಬಲ್ಲದು?

ಏಳು! ಎದ್ದೇಳು!! ದ್ರೌಪದಿ...
ನಿನ್ನನ್ನು ನೀನೇ ಸಂಭಾಳಿಸಿಕೋ....

ಜೂಜಿನ ಹಾಸು ಹಾಸಿ
ಶಕುನಿಗಳು ಕುಳಿತಿರುವಾಗ
ಉಳಿದವರ ಬುದ್ಧಿ  ಓಡಿತೇ...?

ಏಳು! ಎದ್ದೇಳು !!ದ್ರೌಪದಿ.

ನಿನ್ನ ಮಾನ ಉಳಿಸಿಕೊಳ್ಳುವ
ಹೊಣೆ  ಈಗ ನಿನ್ನದೇ...
ಯಾವ ಕೃಷ್ಣನೂ ಇನ್ನಿಲ್ಲಿ ಬರುವದಿಲ್ಲ.....

ಏಳು ! ಎದ್ದೇಳು!! ದ್ರೌಪದಿ!!!

( ಶ್ರೀ, ಅಟಲ್ ಬಿಹಾರಿ ವಾಜಪೇಯಿಯವರ ಹಿಂದಿ ಕವನದ ಅನುವಾದ...)

Wednesday, 8 August 2018

ಗೆಳತಿಗೆ...

ಬಂದುಬಿಡು..
ಯಾವಾಗಲಾದರೊಮ್ಮೆ..

ಹಾಗೇ ಸುಮ್ಮನೇ...

ಒಮ್ಮೆಲೇ
ಪಾರಿವಾಳವೊಂದು
ಅಂಗಳಕ್ಕೆಹಾರಿ
ಬಂದ ಹಾಗೆ...

ಎಲ್ಲಿಂದಲೋ ಸದ್ದಿಲ್ಲದೇ
ತೂರಿಬರುವ
ತಂಪು ಗಾಳಿಯ
ಬಿಸುಪಿನ ಹಾಗೇ....

ಪಕ್ಕದ ಮನೆಯ ಪಾಕಶಾಲೆಯಿಂದ
ಬರುವ ರಸಪಾಕದ
ಘಮಲಿನ ಹಾಗೆ....

ಬಂದುಬಿಡು ಒಮ್ಮೆ...

ತುಂಟ ಮಗುವೊಂದು
ಚಂಡು ಹುಡುಕುತ್ತಾ
ತೋಟದಲ್ಲಿ ನುಸುಳಿ
ಬಂದಹಾಗೆ....

ಪುಟ್ಟ ಅಳಿಲೊಂದು
ಪಾಗಾರ ತನ್ನದೇ
ಎಂದಂದು ಜಿಗಿದಾಡುವ
ಹಾಗೆ..

ಬಾಗಿಲ ಕರೆಗಂಟೆ ಬಾರಿಸಬೇಡ..
ನನ್ನ ಹೆಸರು ಹಿಡಿದು
ಜೋರಾಗಿ ಕೂಗು...
ನನ್ನ ಸಮಯಾನುಕೂಲ
ಕೇಳುವ ಕಾರಣವಿಲ್ಲ...
ನಿನ್ನದನ್ನು ಯಥೇಷ್ಟ ಕೂಡಿಟ್ಟುಕೊಂಡು ಬಾ..

ಬಂದುಬಿಡು ಒಮ್ಮೆ..

ಇಬ್ಬರ ಸಮಯಗಳ ನಡುವೆ ಒಂದು ಉಯ್ಯಾಲೆ ಕಟ್ಟೋಣ..
ಭೂತ,ಭವಿಷತ್ತಿನ ನಡುವಿನ ಜೀಕುಗಳಲ್ಲಿ
ಮಾತುಗಳು ತಂತಾನೇ
ಒಡಮೂಡಿ ಬರುತ್ತವೆ...
ಕಾಗದದ  ಮೇಲೆ
ಕವನದ ಸಾಲುಗಳು
ರೂಹು ಪಡೆದಂತೆ...

ಬಂದುಬಿಡು  ಒಮ್ಮೆ...

ಮರಳಿ ಹೋಗುವಾಗ
ನಿನ್ನೊಂದಿಗೆ ನನ್ನನ್ನು
ಕರೆದೊಯ್ಯಿ...
ನಿನ್ನನ್ನು ಸ್ವಲ್ಪು ಇಲ್ಲಿ
ಉಳಿಸಿ ಹೋಗು...
ಮತ್ತೆ ಮತ್ತೆ ಬರಬೇಕಲ್ಲವೇ?
ನಿನ್ನನ್ನು ನಾನು
ನನ್ನನ್ನು ನೀನು
ಪಡೆಯಬೇಕೆಂದರೆ..

ಬಂದುಬಿಡು ಒಮ್ಮೆ...

(ಮೂಲ:ಗುಲ್ಜಾರ್)
ಮನೋಹರ ನಾಯಕ, ಮನಸಾರೆ ಧನ್ಯವಾದಗಳು..ಇಂಥ ಚಂದದ ಕವನದ  transcreation ನ ಅವಕಾಶ ಕಲ್ಪಿಸಿದ್ದಕ್ಕಾಗಿ...)

Saturday, 30 June 2018

ಕ್ಷಣಗಳು

ಬದುಕಿನಲ್ಲಿಯ
ಸುಂದರ ಗಳಿಗೆಗಳನ್ನಾಯ್ದು
ಮನದಲ್ಲಿಯೇ ಕೂಡಿಸಿಟ್ಟೆ....
ಕೂಡಿಹಾಕಿದ
ಗಳಿಗೆಗಳು ದಿನಗಳಲೆಕ್ಕ_
ವಾಗಲೆಂದು
ಬಿಟ್ಟು ಬಿಟ್ಟೆ..
ಸಮಯಬಂದಾಗ
ಆನಂದಿಸುವೆ...
ವಿಹರಿಸುವೆ..
ಮನಬಂದಂತೆ
ಕಳೆಯುವೆನೆಂದು
ಕನಸುಕಂಡೆ...
ಕೊನೆಗೊಮ್ಮೆ
ಮನಸ್ಸು ಗಟ್ಟಿಮಾಡಿ
ಗೋಲಕ
ಒಡೆದಾಗ
ಆ ಹಳೆ ಕ್ಷಣಗಳು
ವರ್ತಮಾನದಲ್ಲಿ
ಚಲಾವಣೆಯಲ್ಲಿರುವದಿಲ್ಲ
ಆಯಾ ಗಳಿಗೆಗಳು
ಆಯಾ ದಿನಗಳಿಗೆ
ಎಂಬುದ ಕಂಡುಕೊಂಡೆ.
( ಹಿಂದಿ ಮೂಲ)

Thursday, 28 June 2018

ಅವ್ವ

ಅವ್ವ ನೀನಂದು ಕೊಂಡಂತೆ
ನೀನೇನೂ  ಕಡಿಮೆಯಲ್ಲ...
ನಿನ್ನ ಮೇಲೆ ನಿನಗೆ
ಅಸಡ್ಡೆ ಸಲ್ಲ...

ನೀನಿದ್ದರೆ ಮಮತೆಯ ವೃಷ್ಟಿ..
ಬಿಸಿಬಿಸಿ ರೊಟ್ಟಿ...
ಪ್ರೀತಿಯು ಗಟ್ಟಿ...
ನೀನಿದ್ದರೆ ಮನೆಗೆ
ಮರಳುವ ಮನಸು...

ಬೇಕೆಂದುದನ್ನುಉಣ್ಣುವ ಕನಸು...
ನೀನಿದ್ದರೆ ಸಂಬಂಧಗಳ ಬಂಧ...
ನೆರೆಹೊರೆಯವರು ಚಂದ...
ನೀನಿದ್ದರೆ ಹಬ್ಬ...
ದೀವಳಿಗೆಯ ದೀಪ..
ಹೋಳಿಯ ರಂಗು-ರೂಪ...

ನೀನಿದ್ದರೆ ಬರುವವರಿಗೆ ತೆರೆದ ಬಾಗಿಲು..
ಮಮತೆ ತುಂಬಿದ ಮುಗಿಲು...
ಪ್ರೀತಿಯ ಕಡಲು...
ನೀ ನಿಲ್ಲದೇನಿಲ್ಲ ಆದರೆ
ನೀನಿರುವವರೆಗದು
ತಿಳಿಯುವದಿಲ್ಲ.....

( ಹಿಂದಿಯಿಂದ)

Monday, 4 June 2018

ಹಾಗೇ ಸುಮ್ಮನೇ...

ನನ್ನ ಗೆಳತಿಗೆ ಅರವತ್ತು ತುಂಬಿದಾಗ ಕೇಳಿದೆ ; "ಜೀವನವೇನಾದರೂ ಬದಲಾಗಿದೆಯಾ?"
ಅವಳು ಹೇಳಿದಳು:
ಹೌದು ನಾನೀಗ ತುಂಬಾ ತುಂಬಾನೇ ಬದಲಾಗಿದ್ದೇನೆ..
*ನನ್ನ ತಂದೆ ತಾಯಿ,ಸಹೋದರ,ಸಹೋದರಿಯರು,ಗಂಡ,ಮಕ್ಕಳು,ಸ್ನೇಹಿತರು,ಎಲ್ಲರನ್ನೂ ಪ್ರೀತಿಸಿ ಮುಗಿದು ಈಗೀಗ ನನ್ನನ್ನೇ ನಾನು ಪ್ರೀತಿಸುತ್ತಿದ್ದೇನೆ.
* ನಾನು ಅಟ್ಲಾಸ್ ಅಲ್ಲ... ಇಡೀ ಜಗತ್ತು ಹೆಗಲಮೇಲೇನೂ ಹೊತ್ತು ನಿಂತಿಲ್ಲ ಎಂಬುದು  ತಿಳಿದಿದ್ದೇನೆ....
*ಚಿಲ್ಲರೆ ವ್ಯಾಪಾರಸ್ಥರಿಗೆ ಕೆಲವು ಪೈಸೆ ಹೆಚ್ಚು ಕೊಟ್ಟರೆ ನನ್ನ ಜೇಬೇನೂ ಖಾಲಿಯಾಗುವದಿಲ್ಲ..ಬದಲಿಗೆ ಅವರ ಮಕ್ಕಳ ಶಾಲಾಶುಲ್ಕಕ್ಕೆ ಅಷ್ಟಿಷ್ಟು ಸಹಾಯವಾಗಬಹುದು ಎನಿಸತೊಡಗಿದೆ..
*ಹಿರಿಯರು ಹೇಳಿದ್ದನ್ನೇ ಹೇಳತೊಡಗಿದರೆ,' ಒಮ್ಮೆ ಹೇಳಿಯಾಗಿದೆಯಲ್ಲಾ ಮತ್ತೆ ಮತ್ತೆ ಬೇಡ ಅನ್ನುವದಿಲ್ಲ..ಅವರ ನೆನಪುಗಳು ಅವರ ಮುಖದ ಮೇಲೆ ಮುಗುಳ್ನಗೆ ಮೂಡಿಸುವದನ್ನು ಕಣ್ಣಾರೆ ಕಾಣುತ್ತೇನೆ...
*ಯಾರಾದರೂ ತಪ್ಪು ಮಾಡಿದರೆ ತಿದ್ದಲು ಪ್ರಯತ್ನಿಸುವದಿಲ್ಲ..ಅದು ನನ್ನ ಕೆಲಸವಲ್ಲ ಎಂದು ಈಗ ತಿಳಿದಿದ್ದೇನೆ..ಮನಶ್ಯಾಂತಿ ಪರಿಪೂರ್ಣತೆಗಿಂತಲೂ ಶ್ರೇಷ್ಠ ಎಂಬುದು ಅರ್ಥವಾಗುತ್ತಿದೆ...
*ಯಾರಾದರೂ ಒಳ್ಳೆಯದೇನಾದರೂ ಮಾಡಿದರೆ ಮನದುಂಬಿ ಪ್ರಶಂಸಿಸುತ್ತೇನೆ..ಅದು ನಮ್ಮಿಬ್ಬರನ್ನೂ ಖುಶಿಯಾಗಿಡುತ್ತದೆ.
* ನನ್ನ ಹೊರ ಸೌಂದರ್ಯಕ್ಕಿಂತ ಅಂತಃ ಸೌಂದರ್ಯಕ್ಕೆ ಹೆಚ್ಚು ಪ್ರಾಮುಖ್ಯತೆ ಕೊಡುತ್ತಿದ್ದೇನೆ.ವ್ಯಕ್ತಿತ್ವ
ಅದಕ್ಕಿಂತ ಹೆಚ್ಚಿನದು ಎಂಬ ಅರಿವು ಮೂಡಿದೆ.
* ಭಾವನೆಗಳನ್ನು ಬಹಿರಂಗವಾಗಿ ವ್ಯಕ್ತಪಡಿಸಲು ಹಿಂಜರಿಯುವದಿಲ್ಲ.ಅದೇ ಮಾನವೀಯತೆಯ ಸಂಕೇತ ಎಂಬುದು ಅರಿವಾಗಿದೆ..
*ನನ್ನನ್ನು ಒಂಟಿಯಾಗಿಸಬಹುದಾದ EGO ವನ್ನು ನಾನು ಪೋಷಿಸುವದಿಲ್ಲ..ಅದು ಸಂಬಂಧಗಳನ್ನು ಶಿಥಿಲವಾಗಿಸುತ್ತದೆ...
* ಪ್ರತಿದಿನವನ್ನೂ ನನ್ನ ಕಡೆಯ ದಿನವೆಂಬಂತೆ
ತಿಳಿದೇ ಕಳೆಯುತ್ತೇನೆ..ಯಾರಿಗೆ ಗೊತ್ತು...ಆಗಿರಲೂಬಹುದು..
* ಹೌದು ನಾನು ಖಂಡಿತಕ್ಕೂ ಬದಲಾಗಿದ್ದೇನೆ...ನನ್ನನ್ನು ಖುಶಿ ಖುಶಿಯಾಗಿಡುವದು ನನ್ನದೇ ಜವಾಬ್ಧಾರಿ ಎಂಬುದನ್ನು ಅರಿತಿದ್ದೇನೆ....
ಹೌದು ನಾನೀಗ ಬದಲಾಗಿದ್ದೇನೆ...ಇನ್ನೂ ಆಗಬೇಕಾಗಿದೆ...
( ಇಂಗ್ಲಿಷ ಮೂಲದಿಂದ)

Saturday, 28 April 2018

ಮಳೆಬಿಲ್ಲು (ಅನುವಾದ)

( ಅನುವಾದ ನನ್ನ  ಮೊದಲ ಹುಚ್ಚು..ಜಯಶ್ರಿಯವರಿಂದ ಪ್ರೇರಿತಗೊಂಡು ನಾನೂ ಪ್ರಯತ್ನಿಸಿದ್ದೇನೆ...ಅವರ ಓದು,ಬರಹದ ಆಳ ನನ್ನದಲ್ಲ...ಒಂದು ಶಿಶು ಹೆಜ್ಜೆ..ಜಯಶ್ರಿಯವರ ಹೆಜ್ಜೆಗಳ ಹಿಂದೆರಡು ಪುಟ್ಟ ಹೆಜ್ಜೆ..)
ಮುಗಿಲಿನಲ್ಲಿ
ಮಳೆಬಿಲ್ಲು ಕಂಡಾಗಲೆಲ್ಲ
ನನ್ನ
ಹೃದಯ ಮಿಡಿತ
ಆಕಾಶಕ್ಕೇ ನೆಗೆತ...
ನನ್ನ ಬದುಕು ಅಂಕುರಿಸಿದಾಗ,
ಬೆಳೆದು
ದೊಡ್ಡವನಾದಾಗಲೂ ಅಷ್ಟೇ ವರ್ಣಮಯ..
ನನ್ನದೊಂದೇ ಮನದಾಸೆ...
ಮೈಗೆ ಮುದಿತನ ಬರಲಿ..
ಸಾವು ಬಾಗಿಲು ತಟ್ಟಲಿ..
ಮಳೆಬಿಲ್ಲು ಮಾತ್ರ
ಕಣ್ಣುತುಂಬಿರಲಿ...
ಮಗುವು ಮಾನವನ ತಂದೆ...
ನನ್ನ ಮುಂಬರುವ
ದಿನಗಳು ಈ ಭಾವಬಂಧದ
ಸರಪಳಿಯಲ್ಲಿ ಸಹಜ ಸುಂದರ, ಸರಳ
ವಾಗಿ ಹೆಣೆದುಕೊಂಡಿರಲಿ...

Tuesday, 24 April 2018

ಮುಖಾಮುಖಿ

ಮುಖಾಮುಖಿ
( ನಾ ಮೆಚ್ಚಿದ ಇಂಗ್ಲಿಷ ಕವಿತೆಯೊಂದರ ಅನುವಾದ __ನನ್ನಿಂದ..)
ಮನದಾಳ
ಕತ್ತಲಿನಲ್ಲಿ ದಿನದಿನಕ್ಕೆ ಕೊನೆಯುಸಿರೆಳೆವ
ನನ್ನಂತರಂಗದ ಸಾಕ್ಷಿ ಪ್ರಜ್ಞೆಗೆ ಆಗಾಗ
ಮುಖಾಮುಖಿಯಾಗುತ್ತೇನೆ..
ಸುಸಜ್ಜಿತ, ಐಷಾರಾಮಿ
ಹೊಟೆಲ್ಗಳಲ್ಲಿ  ಬಾಗಿಲು ತೆರೆದು ಸ್ವಾಗತಿಸಿದ ಬಂಟನ
ತಿಂಗಳವೇತನದಷ್ಟು
ಮೊತ್ತವನ್ನು ಟೇಬಲ್ಮೇಲೆ ಇಟ್ಟು ಬರುವಾಗ...
ತರಕಾರಿ ಪೇಟೆಯಲ್ಲಿ
ಅಪ್ಪನ ಜೊತೆಯಲ್ಲಿ
ಕುಳಿತು ನಗುನಗುತ್ತ
ತರಕಾರಿ ತೂಗುವ
ಚಿಣ್ಣನೊಬ್ಬ ತನ್ನ ಶಾಲಾದಿನಗಳಾಬಹುದಾಗಿದ್ದ ಹಗಲುರಾತ್ರಿಗಳನ್ನುಬಯಲಿನಲ್ಲಿ ಕರಗಿಸುವದನ್ನು ಕಂಡಾಗ...
ಕೂಡುರಸ್ತೆಯಲ್ಲಿ
ದಾಟಿಹೋಗುತ್ತಿರುವ
ಹೆಣ್ಣಮಗಳೊಬ್ಬಳು
ಮೈಮುಚ್ಚಿ ಮರ್ಯಾದೆಯುಳಿಸಿಕೊಳ್ಳಲು ಹರಕು ಸೀರೆಯನ್ನು ಹಿಂದೆಮುಂದೆ ಜಗ್ಗುವಾಗ'  ಉಡುಪು ತಜ್ನನೊಬ್ಬನ ಥಳಕು ಬಳುಕಿನ ಬಟ್ಟೆ ಧರಿಸಿದ
ನಾನು ಕಿಟಕಿಯ ಬಾಗಿಲು ಮುಚ್ಚಿ ಆಚೀಚೆ ನೋಡಿದ ನಾಟಕವಾಡಿದಾಗ ....
ದೀಪಾವಳಿಯ ಹಬ್ಬಕ್ಕೆ
ದುಬಾರಿ ಉಡುಗೊರೆ
ಖರೀದಿಸುವಾಗ, ರಸ್ತೆಯಲ್ಲಿ ದೀಪ ಮಾರುವ ಬೆನ್ನು ಹತ್ತಿದ ಹೊಟ್ಟೆಯ ಪುಟಾಣಿ ಮಕ್ಕಳನ್ನು ಕಂಡಾಗ...
ಅನಾರೋಗ್ಯದಿಂದಾಗಿ
ಮನೆಗೆಲಸದವಳು ತನ್ನ ಚಿಕ್ಕ ಮಗಳ ಶಾಲೆ ಬಿಡಿಸಿ ಕಳಿಸಿದಾಗ
ಹನಿಗಣ್ಣಾಗಿ ಬಟ್ಟೆ, ಪಾತ್ರೆಯ ರಾಶಿ
ದಿಟ್ಟಿಸುವಾಗ...
ಮಗನಿಗೆ ಬೇಕಾದಾಗ ಮನೆಗೆ ಬರುವ ಸ್ವಾತಂತ್ರ್ಯ ಕೊಟ್ಟು ,ಒಂದುದಿನ ತಡವಾಗಿ ಬಂದ ಮಗಳ ಕಂಡು ಕೆಂಡವಾದಾಗ
ಅವಳ ಕಣ್ಣಲ್ಲಿ ಕಂಡ ಪ್ರಶ್ನೆ ಕಂಡಾಗ..
ಚಿಕ್ಕ ಚಿಕ್ಕ ಮಕ್ಕಳ ಮೇಲಿನ ಅತ್ಯಾಚಾರ,ಕೊಲೆ,ಅಪಹರಣಗಳ ಸುದ್ದಿ ಕೇಳಿದಾಗ : ಸಧ್ಯ ನನ್ನ ಮಗಳಲ್ಲ'ಎಂಬ ನೆಮ್ಮದಿಯ ಉಸಿರು ಬಂದಾಗ...
ಜಾತಿ ಧರ್ಮಗಳ ಮೇಲಾಟದ ಗೊಂದಲಗಳಿಂದಾಗಿ
ನನ್ನ ದೇಶ ಹದಗೆಟ್ಟು
ಹದ್ದುಗಳ ಪಾಲಾಗುವಾಗ
ಸುಲಭವಾಗಿ ಭ್ರಷ್ಟ ರಾಜಕಾರಣಿಗಳ ಹೆಗಲಿಗೆ
ಜವಾಬ್ದಾರಿ ವರ್ಗಾಯಿಸಿ ಪಾರಾದಾಗ..
ನನ್ನ ಊರು ಅತಿ ದೂಷಿತವಾಗಿ
ಉಸಿರುಗಟ್ಟಿ ಸಾಯುತ್ತಿರುವಾಗ
ನನ್ನ ಕಾರನ್ನು ರಸ್ತೆಗಿಳಿಸಿದಾಗ...
ನನ್ನ ಆತ್ಮಸಾಕ್ಷಿ ನನ್ನಿಂದಲೇ ದಿನಾಲೂ ಅಷ್ಟಿಷ್ಟು ಸಾಯುತ್ತ
ಈಗ ಇಲ್ಲವೇ ಇಲ್ಲ ಎಂಬಷ್ಟು ಕ್ಷೀಣಗೊಂಡಾಗ....
ಮೈಕೊಡವಿ ಹಗರವಾಗಲು
ಯತ್ನಿಸುತ್ತೇನೆ..

Tuesday, 10 April 2018

ಮಕ್ಕಳು ದೊಡ್ಡವರಾಗಿದ್ದಾರೆ...

( WhatsApp ನಲ್ಲಿ share ಆಗಿದ್ದ ಹಿಂದಿ ಕವನದ ಅನುವಾದ...ನನ್ನಿಂದ....ಯಾರು ಬರೆದದ್ದು ಗೊತ್ತಿಲ್ಲ...ನನಗೆ ಅತಿ ಮೆಚ್ಚುಗೆಯಾಯಿತು...ಬರೆದವರಿಗೂ, ಹಂಚಿಕೊಂಡವರಿಗೂ ಧನ್ಯವಾದಗಳು)
ಮಕ್ಕಳು ದೊಡ್ಡವರಾಗಿದ್ದಾರೆ...
ಹೆಗಲಮೇಲೆ ಮಲಗಿ ಈಗ
ಯಾರೂ ನಿದ್ದೆ ಮಾಡುವದಿಲ್ಲ...
ಎದೆಗೊತ್ತಿ ಗುಣಗುಣಿಸುತ್ತಿದ್ದ
ಜೋಗುಳ ನೆನಪಿಲ್ಲ...
ಗಳಿಗೆಗೊಮ್ಮೆದ್ದು ಹೊದಿಕೆ ಸರಿಮಾಡುವ ಗೋಜಿಲ್ಲ...
ಮಕ್ಕಳೀಗ ಬೆಳೆದು ದೊಡ್ಡವರಾಗಿದ್ದಾರೆ..
ಹಾಸಿಗೆಗಳೀಗ ಸುಕ್ಕಾಗುವದಿಲ್ಲ...
ಉಟ್ಟ ಬಟ್ಟೆಗಳು ಅಲ್ಲಲ್ಲಿ ಬೀಳುವದಿಲ್ಲ...
ರಿಮೋಟಿಗೆ ಮಾರಾಮಾರಿಯಿಲ್ಲ...
ಮನಮೆಚ್ಚಿದ ಊಟ- ತಿಂಡಿಗಳ ಬೇಡಿಕೆಯಿಲ್ಲ...
ಮಕ್ಕಳೀಗ ಬೆಳೆದು ದೊಡ್ಡವರಾಗಿದ್ದಾರೆ..
ಹಿಂದಿನಿಂದ ಕೊರಳಿಗೆ ಜೋತು ಬೀಳುವದಿಲ್ಲ....
ಬಗ್ಗಿಸಿ ತಗ್ಗಿಸಿ ಬೆನ್ನಮೇಲೆ
ಕುದುರೆ ಸವಾರಿಯಿಲ್ಲ...
ಊಟ ಮಾಡುವಾಗ ಹಕ್ಕಿಗಳೀಗ ಹಾರುವದಿಲ್ಲ..
ಹರಟೆ- ವಾದ- ತರ್ಕಗಳಿಲ್ಲ...
ಜಗಳ ಬಿಡಿಸುವ ಜಂಜಾಟಗಳಿಲ್ಲ...
ಮಕ್ಕಳು ಬೆಳೆದು ದೊಡ್ಡವರಾಗಿದ್ದಾರೆ....
ಕಣ್ಣು ಮುಚ್ಚಿ ತೆಗೆಯುವದರಲ್ಲಿ
ಸ್ವರ್ಗ ಸರಿದಿದೆ...
ಸುಂದರ ಅನುಭೂತಿಗಳು
ಮಾಯವಾಗಿವೆ.....
ಮನೆ ದೊಡ್ಡದಾಗಿ,ವಿಶಾಲವಾಗಿ ಹೆದರಿಸುತ್ತಿದೆ....
ಮಕ್ಕಳೀಗ ಬೆಳೆದು ದೊಡ್ಡವರಾಗಿದ್ದಾರೆ....
ದಿನಕ್ಕೆರಡು ಬಾರಿ
ಆರೋಗ್ಯ ವಿಚಾರಿಸುತ್ತಾರೆ...
ಆರಾಮವಾಗಿರಲು ನೆನಪಿಸುತ್ತಾರೆ...
ನಾವು ಜಗಳ ಬಗೆಹರೆಸುತ್ತಿದ್ದೆವು..
ಅವರೀಗ ನಮಗೆ ಉಪದೇಶಿಸುತ್ತಾರೆ...
ಬಹುಶಃ ನಾವೀಗ  ಮಕ್ಕಳಾಗಿದ್ದೇವೆ..
ಅವರು ಬೆಳೆದು ದೊಡ್ಡವರಾಗಿದ್ದಾರೆ..

ಒಳಗು... ವೃದ್ಧ್ಯಾಪ್ಯ- ಅಂದರೆ 'ಮರು ಬಾಲ್ಯ'- ಅಂತ ಕೇಳಿದ್ದೆ/ನೋಡಿದ್ದೆ/ನಕ್ಕಿದ್ದೆ.ಈಗ ಅನುಭವಿಸುತ್ತಿದ್ದೇನೆ...ಓದಬೇಕು- ನನ್ನಣ್ಣ  ಆಗುವುದಿಲ್ಲ.ಬರೆಯಬೇಕು...