ಹುಟ್ಟು 'ಹಬ್ಬ'ವಾಗಬಹುದಿತ್ತು,
ಬದುಕು 'ಕಬ್ಬ'ವಾಗಬಹುದಿತ್ತು,
ಅದರ ಸಂಗದಲಿ ಸುಖವಿತ್ತು,
ದುಃಖದಿಂದ ಬಹುದೂರ
ನನ್ನ ಮುಖವಿತ್ತು,
ಇಜ್ಜಲೊಲೆಯ ಕೆಂಡದಲ್ಲಿ
ಬಿಸಿಬಿಸಿ ಚಹಾ/ಕಾಫಿಯಿತ್ತು,
ಯಾವುದು, ಎಷ್ಟು ಕುಡಿದರೂ
ಮಾಫಿ ಇತ್ತು...
ಪುಟ್ಟ ಪುಟ್ಟ ಖುಶಿ- ಗಳಿಗೂ
ರೆಕ್ಕೆ ಗಳಿದ್ದವು...
ಅಲ್ಲಿ,ಇಲ್ಲಿ ಇದ್ದ ಚಿಂತೆಗಳೂ ಬೇರೆಯವರ ತೆಕ್ಕೆಗಳಲ್ಲಿದ್ದವು...
ಹಕ್ಕಿಗಳ ಕೊರಳುಗಳಲ್ಲಿ
ಹಾಡುಗಳಿದ್ದವು...
ಎಲ್ಲರಿಗೂ ತಮ್ಮವೇ ಆದ
'ಪಾಡು'ಗಳಿದ್ದವು..
ಇದ್ದುದೆಲ್ಲವ ಮರೆತು
ಬಿಡಬೇಕಿರಲಿಲ್ಲ...
ಇಲ್ಲದಿರುವುದಕ್ಕೆ
ತುಡಿಯಬೇಕಿರಲಿಲ್ಲ...
ವಿಷಾದ ಗೀತೆಗಳಿಗೆ
ತಲೆ ಕೆಡಿಸಿಕೊಳ್ಳ
ಬೇಕಿರಲಿಲ್ಲ...
ಬದುಕು ಎಲ್ಲರನ್ನೂ,
ಯಾವಾಗಲೂ ಬಡಿಯುವದಿಲ್ಲ...
ಧೂಳೆಬ್ಬಿಸಿ ಹಾರುವ
ಚಿಂತೆಗಳನ್ನು ವಿನಾಕಾರಣ
ಹಿಡಿಯುವುದಿಲ್ಲ...
No comments:
Post a Comment