ನಿನ್ನ ಕೈಲಿಹ ಫೋನು...(ಕವನ).

ನಿನ್ನ ಕೈಲಿಹ ಫೋನು 

ಎಲ್ಲೊ ಮುಚ್ಚಿಟ್ಟು ಬಿಡು

ಮರೆತು ಹೋಗಲಿ ಒಂದು ವಾರದಲ್ಲಿ;

ಮರೆಯಾದ ಫೋನದುವೆ 

ತುಸುವೇ ನೆಮ್ಮದಿ ನೀಡೆ;

ಧನ್ಯವಾಯಿತು ಮೋಹ ಅರಿವಿನಲ್ಲಿ.

ನಿನ್ನ ಕೈಲಿಹ ಫೋನು, 

ಬಳಸದೆಯೆ ಇದ್ದುಬಿಡು

ಕಳೆದು ಹೋಗಲಿ ಕಾಲ ನಿನ್ನಿಚ್ಛೆಯಂತೆ;

ಮರೆಗೆ ಸರಿದಿಹ  ಭಾವ 

ಮತ್ತೆ ತುಂಬಲಿ ಜೀವ,

ಶಾಂತವಾಗಲಿ ಮನಸು ಮುನ್ನಿನಂತೆ...

ನಿನ್ನ ಕೈಲಿಹ ಫೋನು, 

ನಿನ್ನದೆಂದೆನಬೇಡ,

ದಾನದಲಿ ಕೊಟ್ಟುಬಿಡು ಮನಸು ಮಾಡಿ;

ಮರೆತ ಹವ್ಯಾಸಗಳು

ಮರುಜೀವ ಪಡೆಯಲಿ,

ಬುದ್ಧಿಮಾಗಲಿ ಕೊಂಚ ಅರಿವುಮೂಡಿ...

ಸ್ವಲ್ಪ ಹೊತ್ತಾದರೂ 

ಮನಸು ಕೇಳಲಿ ಮಾತು;

ಹಿಡಿತವನೆ ಬಿಡುವದು ಸೂಕ್ತವಲ್ಲ;

ಒಮ್ಮೆ ಸೂತ್ರವು ಹರಿದ

ಗಾಳಿಪಟವನೆ ನೋಡು;

ಬದುಕೆ ಬಲಿಕೊಡುವದು ಯುಕ್ತವಲ್ಲ...