ನಿನ್ನೆ_ಇಂದು_ ನಾಳೆ..

'ನಿನ್ನೆ'  'ನಾಳೆ ' ಹೇಗೋ ಎಂದು ಚಿಂತಿಸಿದ ದಿನವೇ-' ಇಂದು' ,

ಈ ದಿನ ಎಷ್ಟು ಸುಂದರವಾಗಿತ್ತೆಂದರೆ

ನಿನ್ನೆ ಇಂದಿನ ಬಗ್ಗೆ ಅದೇಕೆ ಅಷ್ಟೊಂದು

ಯೋಚಿಸಿದೆ, ತಿಳಿಯುತ್ತಿಲ್ಲ.

ಕಾರಣ, ಇಂದು ನಾನು ನಾಳೆಯ ಬಗೆಗೆ

ಚಿಂತಿಸುವುದಿಲ್ಲ.

ನಾಳೆ ಎಂಬುದೇ ಇಲ್ಲವೆಂಬಂತೆ

ಈ ದಿನವನ್ನು ಕಳೆಯುತ್ತೇನೆ...

'ನಾಳೆ' ಅನಿಸಿಕೊಂಡ 'ಇಂದಿ'ನ ಬಗ್ಗೆ 

'ನಿನ್ನೆ'  ಎಷ್ಟೊಂದು ಯೋಜನೆಗಳನ್ನು ಹಾಕಿಕೊಂಡಿದ್ದೆ.

ಬಹಳಷ್ಟು ನಿನ್ನೆ ಅಂದುಕೊಂಡಂತೆ

 ಇಂದು  ನಡೆಯಲೇಯಿಲ್ಲ.

ಕಾರಣ ಇಂದು' ನಾಳೆ' ಎಂಬುದೇಯಿಲ್ಲ ಎಂಬಂತೆ ಇರಬಯಸಿದ್ದೇನೆ...

ಕೇವಲ ಇಂದಿನ ಬಗ್ಗೆ

ಮಾತ್ರ ಯೋಚಿಸುತ್ತೇನೆ...

ನಾಳೆಯಂಬುದನ್ನು ಸಂಪೂರ್ಣ ಮರೆತು...

'ನಾಳೆ' ಎಂದು 'ನಿನ್ನೆ' ಅನಿಸಿಕೊಂಡಿದ್ದ 'ಇಂದಿಗೆ' ಎಷ್ಟೊಂದು ಹೆದರಿದ್ದೆ...

ಇಂದು ಅಂಥದೇನೂ ನಡೆಯದೇ ಕಳೆಯಿತು, ಕಾರಣ, ಇಂದಿನಿಂದ ಕಾಣದ್ದಕ್ಕೆ ಹೆದರುವುದು 

ಬಿಟ್ಟು, ಅದೊಂದು ಅನುಭವ ,ಕಲಿಕೆ ಎಂದು ಭಾವಿಸುತ್ತೇನೆ...

ನಿನ್ನೆಯಂತೆ ಇಂದು ಖಂಡಿತಾ ನಾಳೆಯ ಬಗ್ಗೆ  ಅಂಜುವುದಿಲ್ಲ...

'ನಾಳೆ' ಅನಿಸಿಕೊಂಡ 'ಇಂದಿ'ನ ಬಗ್ಗೆ 

ನಿನ್ನೆ ಹಲವು ಕನಸುಗಳ ಕಂಡಿದ್ದೆ, 

ಕೆಲವು ಇಂದು ನನಸಾಗಿವೆ...

ಕಾರಣ, ಇಂದೂ ನಾಳಿನ ಬಗ್ಗೆ ಕನಸು

ಕಾಣುತ್ತಿದ್ದೇನೆ, ಇಂದಿನ ಕೆಲವಾದರೂ ನಾಳಿನ ಮಟ್ಟಿಗೆ ನಿಜವಾಗಬಹುದು...

'ನಾಳೆ ' ಅನಿಸಿಕೊಂಡ 'ಇಂದಿನ' ಬಗ್ಗೆ 'ನಿನ್ನೆ' ನನ್ನ  ಕೆಲ ಗುರಿಗಳಿದ್ದವು...

ಕೆಲವನ್ನು ಇಂದು ಸಫಲವಾಗಿ ಮುಟ್ಟಿದ್ದೇನೆ, ಕಾರಣ, 'ಇಂದು' 

ಕೆಲ ಹೆಚ್ಚಿನ ಗುರಿಗಳನ್ನು ನಾಳೆಗಾಗಿ ಯೋಜಿಸುತ್ತಿದ್ದೇನೆ,

ಇಂದಿನಂತೆಯೇ ನಾಳೆಯೂ ನನ್ನ ಗುರಿಗಳು ಸಫಲವಾದದ್ದಾದರೆ,

ಮುಂದೊಂದು ದಿನ

'ನಿನ್ನೆ - ಇಂದು - ನಾಳೆ'ಗಳ ಹಂಗೇ ಇಲ್ಲದೇ ಒಂದು ದಿನ ಸಂಪೂರ್ಣವಾಗಿ

ಸಫಲನಾಗಬಹುದು..