ಅಮ್ಮನ ಕೂಗಿಗೆ ನಸುಕಿನಲ್ಲೇ ಏಳೋದು/ ಬಾಗಿಲ ಹಸೆ/ ತೋರಣ/

ರಂಗೋಲಿ/ ಹೊಸ ಬಟ್ಟೆ ಹಾಕಿ ದುರ್ಗಾದೇವಿ ಗುಡಿಗೆ ಹೋಗೋದು/ ತುಂಬಿದ ಬಿಂದಿಗೆಯಲ್ಲಿ ಹೂವು/ ಮಾವು/ ಬೇವು ಸಮೇತ ದೇವಿಗೆ ಅರ್ಪಿಸಿ/ ಎಣ್ಣೆ ದೇವಿಗೆ ಹಚ್ಚಿ, ಅರ್ಧದಷ್ಟು ಮರಳಿ ತಂದು ನಮ್ಮ ಸ್ನಾನದ ನೀರಿಗೆ ಸೇರಿಸಿ ತಲೆಸ್ನಾನ ಮಾಡಿ/ ಹೊಸಬಟ್ಟೆ ಹಾಕಿ ಸಮೀಪದ

ದೇವ- ದೇವತೆಗಳು/ಗುರು- ಹಿರಿಯರು/ ಪಾಲಕರು ಎಲ್ಲರಿಗೂ

ನಮಸ್ಕರಿಸಿ,ಆಶೀರ್ವಾದ‌ ಪಡೆದು, ತಿಂಡಿ ಮುಗಿಸಿ,ಗೆಳತಿಯರ ಮನೆ ಸುತ್ತಾಡಿ, ಮಧ್ಯಾನ್ಹ ಹೋಳಿಗೆ ಉಂಡು/ಸಂಜೆ ತಿಳಿಯಲಿ/ ಬಿಡಲಿ

ಆಚಾರ್ಯರು ಓದುವ ಪಂಚಾಂಗ

ಪಠಣ ಕೇಳಿ...

    ‌‌‌‌          ಆಚರಿಸುತ್ತಿದ್ದ ಯುಗಾದಿ

ನೆನಪಾಗುತ್ತಿದೆ...

          ಹೊಸ ಸೀರೆಗಳನ್ನುಟ್ಟು ಪುಟ್ಟ ಮಕ್ಕಳನ್ನು ಬಗಲಿಗೇರಿಸಿ, ದೊಡ್ಡ ಮಕ್ಕಳಿಗೆ ಗದರುತ್ತ ಓಣಿ‌ಗಳಲ್ಲಿನ‌ ಮುತೈದೆಯರ ಸಾಲುಗಳು/ ಯಾರೇ ಹಿರಿಯರ ದರ್ಶನವಾಗಲೀ ಬಗ್ಗಿ ಮಾಡುವ ನಮಸ್ಕಾರ - ಆಶೀರ್ವಚನ ಗಳು ಇವನ್ನೆಲ್ಲ ನೋಡುತ್ತಾ ಕೇಳುತ್ತ ಸಾಗುವ ನಮ್ಮ ಗುಂಪುಗಳು... ನೆನಪಾಗುತ್ತಿವೆ...

     ‌        ಏನು ಮಾಡುತ್ತೇವೆ

ಯಾಕಾಗಿ  ಮಾಡುತ್ತೇವೆ, ಮಾಡದಿದ್ದರೆ 

ಏನು ಆಗುತ್ತದೆ, ಎಂಬುದಕ್ಕೆ

ಅಜ್ಜಿ ಹೇಳುವ ಕಥೆಗಳನ್ನು ನಂಬುತ್ತ

ಕಿಂಚಿತ್ತು ಮನದಲ್ಲಿ ಕಲ್ಮಷವಿಲ್ಲದೇ

ಕಳೆದ ದಿನಗಳು ಸುರುಳಿ ಸುರುಳಿ

ಬಿಚ್ಚಿಕೊಳ್ಳುತ್ತಿವೆ...

     ‌‌‌    ಆ ದಿನಗಳಿಗೆ ಜಾರಿ ಆನಂದಿಸುತ್ತಿದ್ದೇನೆ ..ಬಾಲ್ಕನಿಯಿಂದ...