ಸ್ವಾಗತ

ಬೇರೆ ಮನೆಯಂಗಳದಿ
ಬೆಳೆದಿರುವ ಹೂವೊಂದು
ನಮ್ಮ ಹಾರದಲಿಂದು ಶೋಭಿಸಿಹುದು...
ಮನಕದೇನೋ ತಂಪು..
ಮನೆಗದೇನೋ ಕಂಪು
ನೂರಾರು ಹೊಸಭಾವ ತಂದಿರುವದು...

ದೂರದಾವುದೋ ತಾಣ
ಅದರ ಉಗಮಸ್ಥಾನ
ನೆಲೆಯರಸಿ ನದಿಯೊಂದು ಹರಿದಿರುವದು...
ಸಾಗರದ ಸಂಗಮದ
ಹೊಂಗನಸು ನನಸಾಗೆ
ಧನ್ಯತೆಯಭಾವದಲಿ ಮಿಂದಿರುವದು...

' ತವರ ತೈಲದ ಹಣತೆ'
ಭಾವಬತ್ತಿಯ ಹೊಸೆದು
ಕುಲವಧುವು ಮನೆಬೆಳಗೆ ಬಂದಿರುವಳು..
ಹೊಸಿಲ ಅಕ್ಕಿಯ ಚಿಮ್ಮಿ..
ಮುಗುಳುನಗೆಯನು ಹೊಮ್ಮಿ
ಗ್ರಹಲಕ್ಷ್ಮಿ ಬಾಗಿಲಲಿ ನಿಂದಿರುವಳು...

ಎಲ್ಲಿಯದೋ ಸಂಬಂಧ
ಯಾವುದೋ ಅನುಬಂಧ
ಸೊಸೆಯಲ್ಲ ಮಗಳೆಂದು ತಿಳಿಯುವೆವು ನಾವು...
ಎತ್ತಣದ ಮಾಮರವೋ
ಎತ್ತಣದ ಕೋಗಿಲೆಯೋ
ಹಾಡಿನಲಿದರೆ ಸಾಕು ಮರೆಸಿ ನೋವು..