ಮಗು...

ಮಗು...

ಏನೆಂದು ಬಣ್ಣಿಸಲಿ,ಶಬ್ದಗಳು ನಾಚುತಿವೆ..
ನಿನ್ನ ಕಿರುಕಂಗಳಿನ ಕಾಂತಿ ನೋಡಿ..
ನಭದಲ್ಲಿ ಓಡುತಿಹ ಚಂದಿರಗೆ ಹೇಳಿಬಿಡು..
ಒಂದಿನಿತೂ ನಡೆಯದು ನಿನ್ನ ಮೋಡಿ...

ಅಚ್ಚರಿಯ ರೂಪವನು ಬೆಚ್ಚಿ ನಾ ನೋಡಿದೆನು..
ಹುಚ್ಚು ಹಿಡಿದ್ಹಂಗಾಯ್ತು ಈ ಮನಸಿಗೆ...
ಅರೆಬಿರಿದ ಮೊಗ್ಗೊಂದ ಹಿಡಿದು ಮುತ್ತಿಟ್ಟಂತೆ..
ಹಾಲ್ಜೇನು ಹರಿದಿತ್ತು ಕಣ್ ಕನಸಿಗೆ...

ಮನದುಂಬಿ ಬಂದಾಗ ಮಾತಿಗೆಲ್ಲಿದೆ ತಾಣ..
ಮೈಮನದ ತುಂಬೆಲ್ಲ ಭಾವಸಂತೆ...
ಕಾದಿಟ್ಟ ಅನಿಸಿಕೆಗೆ ತನ್ನ ನೆಲೆ ಗೊತ್ತಿಲ್ಲ..
ಕೇಳಿ,ನೋಡಿದ್ದೆಲ್ಲ ಅಂತೆ_ಕಂತೆ...

ಸ್ವಚ್ಛ' ಸ್ಫಟಿಕದ ಬಿಂದು' ನಿನ್ನ ಚಲುವಲಿ ಮಿಂದು
ಈ ದಿನದಿ ನಾ ಕಂಡೆ ' ದಿವ್ಯ ಬಿಂಬ'....
ಹಸುಗೂಸು ' ದೇವಸಮ' ಎಂಬಂಥ ಮಾತೊಂದು...
ಮಾರ್ದನಿಸುತಿದೆ ಎನ್ನ ಮನದ ತುಂಬ...